Mambo ya kuzingatia kabla ya kufunga ndoa, uchumba

NA ISSA RAMADHANI.

KARIBU msomaji wangu katika safu hii yenye lengo la kubadilishana na  mawazo na kuelimishama mambo mbalimbali yanayohusiana na masuala ya ndoa, uchumba na mafanikio na changamoto zake.

Leo tutazungumzia mambo muhimu ya kuzingatia kwa wale walio katika uchumba kabla ya kufanya uamuzi mkubwa wa kufunga ndoa.

Kwa watu ambao wapo katika kipindi cha mahusiano ya uchumba kwa muktadha  wa kuwa mke na mume wanapaswa kuzingatia yafuatayo kabla ya kuingia katika hatua hiyo.

Kwa pamoja fanyeni uamuzi wa kupima afya zenu ili kujua hali zenu kabla ya kuingia katika ndoa pia kuepuka kuambukizana magonjwa ya zinaa kama vile kaswende, Ukimwi ,gonorea na endapo mmoja wenu au wote mkibainika kuwa na tatizo basi mnapaswa kutafuta tiba kwanza kwa yale yanayotibika au ushauri nasaha yale yasiyotibika.

wanandoa pichani.

Tendo hili la kupima afya ni la muhimu sana kwa sababu ya kuwa chanzo cha madhara makubwa katika familia ya wawili hao.

Madhara yanayoweza kutokana na kuwa kwenye mahusiano ya kimwili kama mke na mume wakati mkiwa na maradhi ni pamoja na gharama kubwa za matibabu, kuzaa watoto  wenye  matatizo, kusababisha  umasikini  katika  familia kutokana na matumizi makubwa ya rasilimali fedha katika kujitibu.

Fedha ambazo zitatumika kujitibu baba, mama na watoto zingeweza kugharamia maendeleo ya familia kama vile kuanzisha miradi ya kibiashara, kujenga nyumba, kusomesha watoto na mengine muhimu.

Wachumba wanawajibika kujali afya na kupata ushuri kwa wataalamu wa afya na wanasaikolojia mapema  kabla ya kuingia katika ndoa ili  matatizo yote yamalizwe kwa  ushauri na tiba, hii itasaidia sana kuwa na ndoa yenye furaha na afya.

Vijana wengi wa sasa hawazingatii haya na kujikuta wakiwa katika majuto kwa kukurupuka kujikuta wanakutana na wakati mgumu hatimaye  kuwa na migogoro katika ndoa.