Changamoto za wanandoa wanaopishana umri

NA ISSA RAMADHANI.

 NI jambo la kumshukuru Mungu kukutana tena katia safu hii. Leo tutazungumzia wanandoa waliopishana umri.

Kila uchao tumekuwa tukishuhudia watu wengi wakifunga ndoa au kuchumbiana huku wakiwa na tofauti kubwa ya umri iwe mkubwa au mdogo.

Wataalamu wanasema upo umri wa kiafya unaotakiwa katika maamuzi ya kuishi kama wenzi ingawa ni muhimu wapenzi au wanandoa kutokuwa na umri sawa kutokana na sababu za kibaiolojia, kwamba umri wakati mwingine ni dawa muhimu ndani ya familia hasa kwa mwanamume kuwa na umri mkubwa kuliko mwanamke.

Hata tafiti na tathimini za kifamilia zinaonesha umuhimu wa umri mkubwa kwa mwanamume katika kuakisi maandiko matakatifu ya quran na biblia, kwamba mwanamume ni kichwa cha nyumba. Hapa suala nzima la uzoefu wa kiumri huzingatiwa katika umuhimu wake hasa katika kusimamia, kuongoza na kushauri kaya au familia.

Hata hivyo zipo baadhi ya changamoto ambazo zinaweza kufanyiwa kazi na mambo kuwa sawa kwa wanandoa na wachumba wanaopishana umri:

Zinaweza kujitokeza tofauti za kimtazamo kwa wanandoa kujikuta mmoja anapendelea kufanya hivi na mwingine hapendelei mambo hayo.

Wanandoa wanaojivua kwenye maisha ya ndo yao.

Kwa mfano, mwanamume mwenye umri mkubwa hupenda kujadili masuala ya maendeleo, uwajibikaji wa kufanya mambo na kufuatilia zaidi masuala ya familia, wakati kijana kutokana na msukumo wa umri wake  mdogo  anapenda zaidi kutoka ‘out’ na kuwa huru kufanya mambo hata wakati mwingine yanayoweza kuhatarisha ndoa.

Mwanandoa kijana awe mume au mke anapendelea matumizi ya mitandao, kustarehe, na kuchati hivyo kujikuta akivutana mara kwa mara mwenzi wake.

 Sehemu kubwa ya hasa za Kiafrika zinaamini kwamba umri mkubwa wa mwanamke anapoolewa ni wa msingi sana hasa  linapokuja suala  la kuzaa watoto. Watafiti wanasema mwanamke  mwenye umri mkubwa uwezo wake wa  kuzaa unapotea  akiwa na miaka 40-50.

Kwa sasa baadhi ya wasichana wenye umri wa miaka 39-40 hupata mabadiliko ya mzunguko wa hedhi na wengine hukoma kuzaa kwasababu ya ulaji wa vyakula vyenye kemikali ambazo hubadilisha mfumo wa mwili.

Ushauri wangu kwa wachumba waliopishana umri ni kutafuta ushauri mzuri kwa wataalamu wa masuala ya ushauri, wanasaikolojia na watu wengine wenye weledi mzuri wa mambo ya ndoa ili kuweka mambo sawa. Hii itasaidia maisha yao ya ndoa kuwa mazuri, yenye maelewano na furaha.

Alamsiki.