Wazazi CCM K’ndoni wawafunda viongozi

NA MOHAMEDI NG`OULA

JUMUIYA ya Wazazi wa Chama cha Mapinduzi (CCM), Wilaya ya Kinondoni jijini Dar es salaam, imewataka viongozi waliochaguliwa hivi karibuni kuongoza jumuya hiyo kwa ngazi ya Matawi na Kata kuendana na kasi ya mabadiliko ya chama hicho katika kuwajibika.

Katibu wa jumuiya hiyo wilayani ya Kinondoni, Ibrahim Mpwapwa alitoa wito huo wakati wa semina elekezi na mafunzo ya ujasiriamali kwa viongozi hao iliyofanyika katika ukumbi wa CCM  Kata ya Kawe, Manispaa ya Kinondoni  na kusema kuwa wakati umefika sasa  kwa kila mwanachama kushindana katika fursa mabalimbali za kiuchumi.

Baadhi ya wadau ambao wamehudhulia semina

Akifafanua, Mpwapwa alisema mpango wa jumuiya ya wazazi wilayani humo ni kuhakikisha kuwa kila kiongozi anawajibika katika nafasi yake ikiwa ni pamoja na kupita kila Kata na Tawi kuhamasisha wajibu wa jumuiya hiyo, kiuchumi, elimu, mazingira, malezi na maadili kwa mujibu wa kanuni ya jumuiya hiyo.

Utendaji ni pamoja na kila kiongozi kuzingatia maadili, bidii katika katika kazi na kufanya vikao kisha kupeleka muhtasari ya vikao na mikutano kwenye ngazi husika, mathalani ngazi ya tawi wanapaswa kupeleka Kata na hatimaye Wilayani.

 Kwa kufanya hivyo alisema, watakuwa mfano na kivutio kwa watu wanao waongoza na wengine ambao sio wanachama wa CCM au Jumuiya hiyo kujiunga na chama hicho kwa yapo watu hao wanaojifunza kupitia kwao.

“Kiongozi asiyekwenda na wakati, mvivu, mvunjifu wa maadili atambue kwamba ataondolewa kwenye nafasi yake. Tunataka jumuiya ya wazai ya mfano, CCM yenye maendeleo. Lazima tufanya kazi kwa wito na kwa maadili yenye mvuto,”alisisitiza Mpwapwa.

 Sifa zingine za kiongozi  wa jumuiya hiyo ni kuwa wakati wote anabuni mbinu mbalimbali za kuhakikisha kwamba chama chake kinashinda nafasi za uongozi, kuongeza wanachama na kubuni vyanzo vya fedha.

Kwa upande wake Mwenyekiti wa Jumuiya hiyo Kata ya Kawe,  Benjamini Maliwa alisema pamoja na majukumu kisiasa kwa viongozi hao, ni wajibu wao kuhakikisha kwamba wanashiriki mafunzo ya kujiajiri ili kufikia malengo ya taifa la uchumi wa kati ya njia ya viwanda.

“Tumekusudia kila mmoja wetu anajishughulisha na ujasiriamali kwa wale ambao hawana vyanzo vingine vya mapato kama vile ajira. Ili kufikia malengo hayo, ni lazima kuwapo kwa mafunzo kama haya ambapo huweza kumfanya mtu kuwa na mfugaji, mkulima na hatimaye kuanzisha kiwanda kidogo cha uchakataji wa mazao ngazi ya kaya au kwingine,”alisema.